Խնդրում ենք ներկայացնել առաջարկություններ ՀՀ կառավարության 2021 թվականի հոկտեմբերի 14-ի N 53 նիստի արձանագրության 33-րդ կետի և 2022 թվականի մարտի 15-ի Ֆինանսատնտեսական նախարարական կոմիտեի նիստում «Տնամերձ հողամասերում ինտենսիվ այգեհիմնման և ոռոգման արդիական համակարգերի ներդրման փորձնական ծրագիրը հաստատելու մասին» ՀՀ կառավարության որոշման նախագծի վերաբերյալ: Բնակավայրի համար պարտադիր պայման է՝ 1) բնակավայրերում ոռոգման ջրի հասանելիությունը։ Ցանկալի պայման է ոռոգման ներքին ցանցի առկայությունը, 2) բնակավայրերում տնամերձ հողամաս ունեցող տնտեսավարողների շուրջ 80 տոկոսի մասնակցությունը ծրագրին և նրանց պատրաստակամությունը նախքան ծրագրի մեկնարկը ազատելու տնամերձ հողամասը առկա ծառերից (գրավոր համաձայնություն), 3) ծրագրին մասնակցող տնտեսավարողների տնամերձ հողամասերի մակերեսի հանրագումարը (չհաշված շենք շինության զբաղեցրած հողամասը և բակային տարածքը) բնակավայրում կազմի մինչև 40 հեկտար, 4) տնտեսավարողները առնվազն 300 քառ. մետր տնամերձ հողամասում պետք է այգետնկում իրականացնեն միևնույն պտղատեսակի ցածրաճ կամ խաղողի սեղանի սորտերի տնկիներով, 5) տնտեսավարողները պետք է մասնակցեն մատակարարի կողմից կազմակերպած որակավորման դասընթացներին և իրականացնեն խորհրդատուի ցուցումները։ Միաժամանակ հայտնում ենք, որ փորձնական ծրագրի շրջանակում մատակարարների կողմից այգեհիմնումը կիրականացվի հավաստագրված տնկանյութով (տեղական արտադրության տնկանյութի դեպքում՝ բուսասանիտարական անձնագիր), ոռոգման կաթիլային համակարգի ներդրմամբ և առնվազն երեք տարի այգեգործության և ոռոգման արդիական համակարգերի շահագործման վերաբերյալ խորհրդատվական ծառայությունների տրամադրմամբ։ Փորձնական ծրագիրն իրականացվելու է յուրաքանչյուրի տնամերձ հողամասում այգեհիմնման և ոռոգման կաթիլային համակարգի ներդրման համար մատակարարների կողմից կատարված փաստացի ծախսերի, ինչպես նաև այգեհիմնման համար խորհրդատվական ծառայությունների տրամադրման մեկ տարվա ծախսերի փոխհատուցմամբ (Էկոնոմիկայի նախարարության կողմից կփոխհատուցվի կատարված փաստացի ծախսերի 80 տոկոսը, համայնքի կողմից՝ 10 տոկոսը, տնտեսավարողների կողմից՝ 10 տոկոսը)։